Кувайт: Ҷашни наврӯзӣ бо иштироки намояндаҳои аксар давлатҳои дунё

Душанбе, 25.03.2016. (АМИТ «Ховар»). -Гурӯҳи фарҳангиёни Тоҷикистон имшаб барномаи фарҳангии худро дар театри ба номи Абдулҳусайн Абдурризои давлати Кувайт бо маҳорати баланди касбӣ барпо намуданд. Дар барномаи мазкур беш аз панҷсад меҳмон иборат аз намояндаҳои корпусҳои дипломатӣ ва сафоратҳои муқими ин кишвар, аҳли фарҳанг ва дӯстдорони санъати волои тоҷикона иштирок намуданд. Ба театри мазкур суманак ва матоъҳои дорои рамзи суннатии тоҷикона зиннати дигар мебахшид. Созмондиҳии барнома хуб ба роҳ монда шуда буд.
Аз садои кафкӯбиҳо маълум мешуд, ки ба тамошобинон барномаи ҳунарии тоҷикон хуб писанд омадааст. Яке аз ҷолибтарин лаҳзаҳои ин барнома он буд, ки ҳангоми пианино навохтани ҳунарманди хурдсоли тоҷик Ҷаннат Ҳусайнзода якбора кафкӯбиҳои онҳо авҷ мегирифт. Ҳамзамон пас аз сурудани суруди арабӣ аз ҷониби ҳунарманди шинохта Афзалшо Шодиев толори театро мавҷи баланди кафкӯбиҳои тамошобинон фаро гирифт. Дар ин барномаи консертӣ саҳми ансамбли созҳои миллӣ, ки иборат аз дафу рубобу ғижжак, най, карнай ва арғунун буд, кам набуд.
Барномаҳои дигари фарҳангии тоҷикон дар Кувайт идома доранд.