Мониторинги зараррасонҳои пахта

Душанбе, 29.03.2016. (АМИТ «Ховар»). – Дар соли 2015 аз ҷониби олимон-энтомологҳои Институти зоология ва паразитологияи Академияи илмҳои Ҷумҳурии Тоҷикистон якҷоя бо олимони Институти экология ва ҷуғрофияи Академияи илмҳои Ҷумҳурии Мардумии Чин бо мақсади ба роҳ мондани мониторинги зараррасонҳои пахта дар ноҳияҳои Бохтар, Рўдакӣ, Ҳисор ва Қабодиён домҳои рушноӣ насб карда шуд.
Ин имконият дод, ки мониторинги зараррасонҳои пахта дар майдони 20 га заминҳои киштзор ба роҳ монда шавад. Аз моҳи апрел то аввалҳои июл парвози шабонарўзии шабпалакҳои бумчашм дар минтақаҳои дар боло зикршуда, гузаронида шуд. Дар оянда якҷоя бо олимони Институти экология ва ҷуғрофияи Академияи илмҳои Ҷумҳурии Мардумии Чин маълумоти гирифташуда, барои таҳия намудани пешгўии паҳншавии шабпалакҳои бумчашм дар киштзорҳои кишоварзии ин ноҳияҳо истифода бурда мешавад.