Ҳодисаҳои нохуши нақлиётӣ дар роҳҳо

Душанбе, 22.03.2016. (АМИТ «Ховар»). – 21 март ронандаи автомашинаи тамғаи “ЗИЛ-130”, марди 46-солаи сокини ноҳияи Шуғнон, ҳангоми ҳаракат дар роҳи автомобилгарди “Душанбе-Хоруғ-Мурғоб” дар километри 620-уми ҳудуди деҳаи Боғеви ноҳияи Шуғнон аз уҳдаи идораи воситаи нақлиёт набаромада, ба автомашинаи тамғаи “БМВ” таҳти идораи ронанда, марди 30-солаи сокини ҳамин ноҳия бархӯрда, чаппа шудааст. Дар натиҷа ронандаи автомашинаи “ЗИЛ-130” ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст. Ронандаи автомашинаи тамғаи “БМВ” ҷароҳати ҷисмонӣ бардошта, дар беморхона бистарӣ шудааст.

Инчунин, дар ин рӯз, ронандаи автомашинаи тамғаи “Опел-Зефира”, марди 35-солаи сокини ноҳияи Хуросон, ҳангоми ҳаракат аз самти ш. Душанбе ба самти ш. Қурғонтеппа дар километри 46-уми ҳудуди ҷамоати деҳоти Обикиики ноҳияи Хуросон бехатарии ҳаракат дар роҳро таъмин карда натавониста, писарбачаи 5-солаи сокини ноҳияи зикргардидаро пахш намудааст. Дар натиҷа, писарчаи хурдсол ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст.