Ошкор гардидани лампаҳои тафсон дар ноҳияи Рӯдакӣ

Душанбе, 29.03.2016.(АМИТ Ховар).- Зимни муоинаи гумрукӣ аз анбори ҷамоати деҳоти Сарикиштии ноҳияи Рӯдакӣ гумрукчиёни тоҷик 140 адад қутии картонии дорои ранги зардро дарёфт намуданд, ки дар дохили онҳо 14 000 лампаҳои тафсони 60 Ватта мавҷуд буд. Аз дафтари матбуоти Хадамоти гумруки кишвар ба АМИТ Ховар иттилоъ доданд, ки нигоҳ доштани миқдори зиёди лампаҳои тафсон дар анбор дар асоси маълумоти фаврӣ ошкор гардидааст.
Лампаҳои тафсон ба шаҳрванд М.Б таалуқ дорад. Нисбат ба ин ҳолат парвандаи маъмурӣ боз гардида, барои тафтишот ба суди ноҳияи Фирдавсии пойтахт фиристода шуд. Бояд тазаккур дод, ки воридот ва фурӯши лампаҳои тафсон дар кишвар тибқи Қарори Ҳукумати Ҷумҳурии Тоҷикистон аз моҳи августи соли 2009 инҷониб манъ гардидааст.