Парлумон ба қонуни матбуот илова ворид менамояд

Душанбе, 07.03.2016.(АМИТ «Ховар»).-Интизор меравад, ки дар арафаи таҷлили Рӯзи матбуоти тоҷик палатаи поёнии Парлумони Тоҷикистон лоиҳаи Қонуни Ҷумҳурии Тоҷикистон «Оид ба ворид намудани иловаҳо ба Қонуни Ҷумҳурии Тоҷикистон «Дар бораи матбуоти даврӣ ва дигар воситаҳои ахбори омма»-ро баррасӣ ва қабул намояд. Масълаи мазкур имрӯз дар ҷаласаи навбатии Шӯрои палатаи поёнии Парлумони кишвар, ки таҳти раёсати Шукурҷон Зуҳуров-Раиси Маҷлиси намояндагон баргузор гардид, мавриди баррасӣ қарор гирифт. Дар ҷаласаи Шӯро ҳамзамон Созишномаи маблағгузорӣ (Амалиёти махсус) оид ба Лоиҳаи тақвияти таҳсилоти касбии техникӣ ва омӯзиш байни Ҷумҳурии Тоҷикистон ва Бонки осиёии рушд, Созишномаи грантӣ (Маблағгузории беруна) оид ба Лоиҳаи тақвияти таҳсилоти касбии техникӣ ва омӯзиш байни Ҷумҳурии Тоҷикистон ва Бонки осиёии рушд муҳокима гардид.
Масъалаҳои мазкурро раисони кумитаҳои Маҷлиси намояндагон Олимҷон Салимзода, Лутфия Раҷабова ва дигар аъзои шӯро тавзеҳ доданд. Қисме аз масъалаҳо барои баррасӣ ба ҷаласаи иҷлосияи панҷуми Маҷлиси намояндагони Маҷлиси Олии Ҷумҳурии Тоҷикистон даъвати дуюм ва қисми дигар барои додани хулосаи ташхиси ҳуқуқӣ ба шуъбаи ҳуқуқи дастгоҳи Маҷлиси намояндагони Маҷлиси Олии Ҷумҳурии Тоҷикистон пешниҳод шуданд.