Сабқати футболбоззанон бахшида ба Рӯзи модарон

Душанбе, 03.03.2016 (АМИТ «Ховар»).- Мусобиқаи футболи занона бахшида ба Рӯзи модарон, ки рӯзи панҷшанбе, 3 март дар майдони захиравии Варзишгоҳи марказии Душанбе оғоз меёбад, то 6 март идома хоҳад кард. Дар ин бора аз КМО Тоҷикистон хабар доданд.
Ба иттилои Дилором Нусратуллоева, мудири шуъбаи футболи занонаи Федератсияи футболи Тоҷикистон дар мусобиқа ҳашт даста ширкат меварзад.
Дастаҳо ба ду гурӯҳ тақсим шудаанд. Бар асоси қуръакашӣ ба гурӯҳи «А дастаҳои «Хуҷанд» (Хуҷанд), «Вахш» (Қурғонтеппа), тими мунтахаби духтаронаи Тоҷикистон (U-14) ва «Барқ» (Норак) ва ба гурӯҳи «Б» «Ласточка» (Душанбе), «Зебо» (Ҷиликӯл), «Ситора» (Фархор) ва «Регар-ТадАЗ» (Турсунзода) дохиланд.
Тибқи низомномаи мусобиқа ғолибони гурӯҳҳо ба бозии ниҳоӣ роҳ меёбанд. Дастаҳое, ки дар гурӯҳҳо ҷойҳои дувумро мегиранд, барои ҷойи севум талош хоҳанд кард. Бозиҳо аз ду қисми 35 дақиқаӣ иборатанд. Бозиҳои ҳалкунандаи мусобиқот рӯзи якшанбе, 6 март барпо мегарданд.
«Ин мусобиқа барои дастаи мунтахаби духтаронаи Тоҷикистон (U-14), ки охири моҳи апрел дар мусобиқоти минтақавии қаҳрамонии Осиё дар Душанбе ширкат меварзад, як марҳилаи омодагӣ маҳсуб мешавад, — иброз дошт Дилором Нусратуллоева.