Шоми имрӯз муаллифи «Пайғоми ашк» маҳфили эҷодӣ дорад

Душанбе, 01.03.2016.(АМИТ «Ховар»).-Шоми имрӯз ё дар нахустин шоми фасли зебои баҳор шоири маъруфи тоҷик, барандаи Ҷоизаи адабии ба номи Мирзо Турсунзода Давлат Сафар дӯстдорони шеъру сурудро ба маҳфили эҷодии худ, ки дар «Кохи Ҷомӣ» баргузор мегардад, даъват менамояд. Маҳфили эҷодии шоири ширинкаломи тоҷик Давлат Сафар ба ҷашни фархундапайи Наврӯз ва ҳамоиши байналмилалии шоирони кишварҳои ҳавзаи Наврӯз бахшида шудааст. Интизор меравад, ки маҳфили эҷодии Давлат Сафарро ҳунармандони шинохтаи кишвар, устодони санъати Тоҷикистон, назири Файзалӣ Ҳасан, Ҷамшед Исмоил, Лутфулло Давлат, Исроил Файзиддин, Сафар Раҳмон ва Ҳақназари Ҳукумзод бо созу сурудҳои дилнишин пуршукӯҳтар намоянд.
Бояд тазаккур дод, ки Давлат Сафар муаллифи маҷмӯаҳои ашъори «Пайғоми ашк», «Шеъри гаҳвора», «Шаҳбол», «Дурахши Истиқлол», «Авҷи парвоз», «Исёни ғурур» ва «Девони ашъор» мебошад.