Таҷлили иди Наврӯз дар зодгоҳи Рӯдакӣ

Душанбе,25.03.2016 (АМИТ Ховар).-23 юми марти соли равон дар деҳаи зебоманзараи Панҷрӯди шаҳри Панҷакент, ки ҳамҷун зодгоҳи сардафтари адабиёти классики форс-тоҷик Абӯабдуллоҳ Рӯдакӣ маъруф аст, бо иштироки адибони ҳавзаи Наврӯз иди байналмилалии Наврӯз таҷлил шуд.
Дар ин ҷашни пуршукӯҳ адибони ҳавзаи Наврӯзро, ки аз Амрико, Олмон, Афғонистон, Эрон, Покистон, Ҳиндустон ва Ҳоланд омадаанд, шоирони халқии Тоҷикистон Камол Насрулло, Гулназар, Хайрандеш ва чанд тани дигар ҳамроҳӣ карданд.
Онҳо аввал марқади Одамушшуаро Абӯабдуллоҳи Рӯдакиро зиёрат карда, пасон аз осорхона ва чойхонаи назди он дидан намуданд.
Мардуми ин деҳаи зебоманзар анъанаи наврӯзии тоҷиконро бори дигар ба меҳмонон нишон дода, дастурхон густурдаву хотири онҳо ва сокинони деҳаро бо қироати сурудҳои халқии наврӯзӣ ва базму рақс болида сохтанд.