Тадқиқоти миллӣ дар соҳаи истеъмоли маводи нашъаовар дар байни ҷавонон

Душанбе, 01.03.2016. (АМИТ «Ховар»). — Аз 29 феврал то 1 марти соли равон бо дастгирии Раёсати СММ оид ба маводи нашъаовар ва ҷинояткорӣ дар чорчӯбаи Барномаи минтақавӣ барои Афғонистон ва кишварҳои ҳамсоя дар Агентии назорати маводи нашъаовари назди Президенти ҶТ семинар дар мавзӯи «Тадқиқоти миллӣ дар соҳаи истеъмоли маводи нашъаовар дар байни ҷавонон» доир шуд.
Дар семинар ҳамоҳангсози минтақавии Раёсати СММ оид ба маводи нашъаовар ва ҷинояткорӣ Сенё Агбохлах, намояндагони созмонҳои давлатӣ, аз ҷумла вазоратҳои тандурустӣ ва ҳифзи иҷтимоии аҳолӣ, маориф ва илм, агентии омор ва кумитаи ҷавонон, варзиш ва сайёҳӣ ширкат варзиданд.
Дар семинари мазкур иштирокдорон масъалаҳои тадқиқотро оид ба суиистеъмоли маводи психоактивӣ дар байни наврасону ҷавонон муҳокима намуданд.
Дар семинар иштирокдорон роҳҳои пурзӯр намудани иқтидор дар соҳаи ҷамъоварии мавод, баҳогузорӣ ва ҳамоҳанг сохтани ҳамкориро дар соҳаи пешгирӣ баррасӣ намуданд.