Қабули «Барномаи давлатии рушди муассисаҳои фарҳангӣ дар вилояти Суғд барои солҳои 2016-2020»

Душанбе, 9.04.2016 /АМИТ «Ховар/. Дар асоси қарори Ҳукумати Ҷумҳурии Тоҷикистон аз 9 феврали соли 2016, «Дар бораи тасдиқи Барномаи рушди муассисаҳои фарҳангӣ дар вилояти Суғд барои солҳои 2016-2020» ва бо мақсади таъмини рушд ва фаъолияти бонизоми муассисаҳои фарҳангӣ дар вилоят «Барномаи давлатии рушди муассисаҳои фарҳангӣ дар вилояти Суғд барои солҳои 2016-2020» ва Нақшаи чорабиниҳои барномаи мазкур дар вилояти Суғд тасдиқ карда мешавад.

Барномаи рушди муассисаҳои фарҳангӣ дар вилояти Суғд бо мақсади татбиқи дастуру супоришҳои Асосгузори сулҳу Ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таҳия гардида, мақсади асосии барномаи мазкур таъмини рушди устувори муассисаҳои фарҳанг дар марҳилаи нави пешрафти ҳаёти иҷтимоӣ-иқтисодӣ ва фарҳангии вилояти Суғд, таҳкими заминаи рақобатпазири моддӣ-техникӣ, тарбияи кадрҳои соҳа, татбиқи самарабахши нерӯи фарҳангӣ ва маънавии афроди ҷомеа мебошад.

Тибқи иттилои Хадамоти матбуоти раиси вилояти Суғд дар айни ҳол дар вилоят 354 адад китобхонаҳои оммавӣ, 275 адад клубҳо, 7 адад осорхона, 15 боғи фарҳангию фароғатӣ, 5 театри халқӣ, 7 ансамблҳои тарона ва рақс, 6 театри касбӣ, 1 Филармонияи халқӣ, муассисаҳои давлатии вилоятии Кохи фарҳангии ба номи Абӯабдуллоҳи Рӯдакӣ, ансамбли шашмақомхонони «Нури Хуҷанд», мактаби рақсии «Зебо Аминзода», Қасри маданияти Арбоб фаъолият намуда, дар рушди соҳа ва болоравии фарҳангу маънавиёти мардум саҳмгузор мебошанд.