Қаллобон дубора муҷозот мешаванд

Душанбе, 7.04.2016. /АМИТ «Ховар»/. Ба ШВКД-1 дар ноҳияи Фирдавсӣ зани 36-солаи сокини шаҳри Душанбе муроҷиат намудааст, ки 1 апрели соли равон шахси номаълум пинҳонӣ вориди хонаи истиқоматиаш шуда, аз он ҷо ҷавоҳироти тиллоӣ, ҷамъ ба маблағи 14 ҳазору 40 сомониро дуздида, аз ҷойи ҳодиса ғайб задааст.
Кормандони милитсия ҷавондухтари 17-солаи сокини шаҳри Душанберо бо гумони содир намудани ин ҷинояти дуздӣ дастгир намуданд.
Ҳамчунин дар ноҳияи Ҷаббор Расулови вилояти Суғд шаби 3 ба 4 апрели соли равон шахсони номаълум бо роҳи пинҳонӣ аз дохили оғилхонаи зани 34-солаи сокини ҳамин ноҳия 8 сар чорвои хурди шохдорро дуздидаанд.
Арзиши чорвои дуздидашуда 4 ҳазору 800 сомониро ташкил медиҳад. Аз ҷониби кормандони милитсия ду нафар марди 24 ва 31-солаи сокинони ҳамин ноҳия, ки ҳарду ҳам қаблан суд шудаанд, дастгир гардиданд.
Нисбат ба далелҳои мазкур парвандаи ҷиноятӣ оғоз шуда, тафтишот дар ин самт давом дорад.
Дар ин бора аз Вазорати корҳои дохилии Ҷумҳурии Тоҷикистон ба АМИТ «Ховар» хабар доданд.