Ғасби беш аз 1000 гектар қитъаи замин дар Хатлон

Душанбе, 18.04.2016 /АМИТ «Ховар/. Кормандони кумитаҳои идораи замини шаҳру ноҳияҳои вилояти Хатлон дар натиҷаи санҷиш 1 ҳазору 268 ҳолати истифодаи ғайриқонунии қитъаи заминро ошкор карданд.
«Майдони ғайриқонунӣ ишғолнамуда, ки 2 ҳазору 417 гектарро ташкил медиҳад, ба ҳолати аввала баргардонида шуда, ҳамзамон қонуншиканҳо ба маблағи 230 ҳазор сомонӣ ҷарима гардиданд», — гуфт Хуршед Бобоев, раиси Кумитаи идораи замини вилоят.
Инчунин гуфта шуд, ки аз тарафи кормандони худи кумитаи вилоятӣ дар семоҳаи аввали соли равон 166 ҳолати қонуншиканӣ ошкор гардидааст, ки бештари он ба ноҳияҳои Ҷ. Балхӣ, Вахш, Н. Хусрав, Қубодиён, Панҷ ва Ёвон тааллуқ доранд.
Масъулин аз он нигаронанд, ки дар ҷомеаи имрӯза як зумра афроде пайдо шудаанд, ки худро аз ин ё он муассиса ва идораи замин муаррифӣ намуда, ба мардум бо роҳи найранг қитъаи муайяни заминро бо маблағи калон мефурӯшанд. Бинобар ин, аз ҳамаи сокинону шаҳрвандон хоҳиш карда мешавад, ки ҳушёрию зиракиро аз даст надода, ба доми чунин ашхос наафтанд.