Барои бартараф намудани камбудиҳо масъулини қисмҳои низомӣ супоришҳои қатъӣ гирифтанд

Душанбе, 14.04.2016. /АМИТ «Ховар»/. Ба масоили пурзӯр намудани интизоми ҳарбӣ, ҳифз ва ҳимояи шаҳрчаҳои низомӣ, беҳтар намудани сатҳу сифати даъвати шаҳрвандон ба хизмати ҳарбӣ бояд таваҷҷуҳи зиёд карда шавад, зеро он ба вазъи омодагии Қувваҳои Мусаллаҳ таъсири бевосита мерасонад. Ин нукта дар ҷаласаи ҳайати мушовараи Вазорати мудофиаи Ҷумҳурии Тоҷикистон таъкид гардид.
Дар ҷаласа инчунин як қатор масъалаҳои муҳими соҳавӣ, аз ҷумла оид ба омодагии ҷангӣ, тайёрии амалиётӣ, вазъи ҷинояту қонуншиканиҳо, ҳолати нигаҳдорӣ ва истифодаи самараноки техникаҳои зиреҳпӯши ҷангиву автомобилӣ, ҷараёни чорабиниҳои даъвати шаҳрвандон ба хизмати ҳатмии ҳарбӣ, қабулу ҷобаҷокунии наваскарон дар қисмҳои низомӣ, натиҷаҳои санҷиши инспексионӣ ва дигар самтҳои фаъолияти ин ниҳоди қудратӣ таҳлил шуданд.
Инчунин вазъи кунунии Қувваҳои Мусаллаҳ ҳамаҷониба таҳлил гардида, вобаста ба як қатор камбудиву норасоиҳо дар фаъолияти баъзе раёсатҳои навъи қӯшунҳо ва қисмҳои низомӣ изҳори нигаронӣ карда шуд ва барои бартараф намудани мушкилоти ҷойдошта ва ҳалли дигар монеаҳои мавҷуда, масъулини дахлдор дар муҳлати муайян супоришҳои қатъӣ гирифтанд.
Дар ҷаласа барои сазовор истиқбол гирифтани 25-умин солгарди Истиқлолияти давлатӣ, пурра аз байн бурдани рафторҳои ғайриоинномавӣ, сари вақт мусоидат намудан вобаста ба ҳалли ҳама мушкилоти афсарону сарбозон дар қисмҳои низомӣ, ғамхории ҳамаҷониба зоҳир намудан ба наваскарон ҳангоми аз бар кардани барномаҳои рӯзмарраи таълимӣ масъулини дахлдори Вазорати мудофиа бо супоришҳои мушаххас вазифадор карда шуданд.