Беш аз 76 сокинони ноҳияи Шаҳринав ба ФР фиристода шуданд

Душанбе, 18.04.2016. /АМИТ «Ховар»/. Беш аз 76 сокинони ноҳияи Шаҳринав ба вилоятҳои Волгоград, Самара ва Краснодари Федератсияи Русия барои кор фиристода шуданд.
Тавре ки мудири бахши Хадамот дар ноҳияи Шаҳринав Муҳибулло Бобоев иброз намуд, танзими давлатии муносибатҳои меҳнатӣ, шуғли аҳолӣ, таъсиси ҷойҳои нави корӣ, касбомўзӣ ва муҳоҷирати аҳолӣ ба суботи иҷтимоӣ ва сатҳи зиндагии аҳолӣ таъсири бевосита дорад. Дар соли сипаригашта 834 сокини ноҳия ҳамчун бекор ба қайд гирифта шуда, ба 486 нафар расман мақоми бекорӣ дода шуд.Тавассути татбиқи нақшаи чорабиниҳои «Барномаи мусоидат ба шуғли аҳолӣ» 315 нафар шаҳрванд бо ҷойҳои корӣ таъмин гардиданд.
«Дар семоҳаи аввали соли равон ба шуъбаи Агентӣ 603 сокини ноҳия муроҷиат намуд, ки 298 нафари онҳо ҳамчун бекор ба қайд гирифта шуда, ба 155 нафар расман мақоми бекорӣ дода шуд. Тавассути татбиқи чорабиниҳои «Барномаи мусоидат ба шуғли аҳолӣ дар маҷмӯъ 94 нафар шаҳрвандон бо ҷойҳои кори бандшуда (квотаҳо) ва тавассути ташкили корҳои фардӣ 13 нафар соҳиби ҷойи кор шуданд. Дар асоси шартномаҳои тарафайн бо корхонаву ташкилотҳо 40 нафар ба корҳои ҷамъиятӣ ва 97 нафар аз ҳисоби маблағҳои буҷетӣ мувофиқи барнома дар марказҳои таълимию касбии мақомоти шуғли аҳолӣ ба омўзиши касбу ҳунар фаро гирифта шуданд»,-илова намуд М.Бобоев.
Вобаста ба ин дар самти касбомўзӣ, бозомўзонӣ ва шаҳодатномакунонии малакаҳои касбӣ, инчунин ҷалб намудани бекорон 200 шахси бекор ба курсҳои қаннодӣ, дӯзандагӣ, омўзиши забони русӣ, қолинбофӣ ва омўзиши асосҳои компютер ҷалб карда шуданд.
«Дар айни замон ба Бахши Хадамоти муҳоҷират дар ноҳия 181 муҳоҷири меҳнатӣ муроҷиат намуд. Аз 181 муҳоҷирони муроҷиатнамуда танҳо ба 92 нафар ворид шудан ба қаламрави Федератсияи Русия иҷозат дода шуд, ки ин 50%-и муроҷиаткардагон мебошад.