Биёед, ояндаро бо ҳам бисозем!

Душанбе, 28.04.2016 /АМИТ Ховар/. 26 апрел дар Донишкадаи давлатии забонҳои Тоҷикистон ба номи Сотим Улуғзода мулоқоти раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Аҳтам Абдуллозода бо донишҷӯён таҳти унвони «Биёед, ояндаро бо ҳам бисозем!» баргузор гашт. Зимни мулоқот аз тарафи Иттифоқи ҷавонони ҷумҳурӣ ҳамоиш гузаронида шуда, варақаҳои дорои иттилооти гуногун вобаста ба тағйиру иловаҳо ба Конститутсия байни донишҷӯёни донишкада тақсим гардиданд.
А. Абдуллозода  вобаста ба нуктаҳои асосии тағйиру иловаҳо ба қонуни сарнавиштсоз иброз дошт, ки соли 2016 аз нигоҳи сиёсиву иқтисодӣ ва фарҳангӣ барои миллати тоҷик соли муҳим ва сарнавиштсоз мебошад. Имсол барои мо аз нигоҳи аввал имтиҳон аст, вале аз нигоҳи дигар давраи мустаҳкам кардани камолоти миллат ва дар замири ҳар яки мо таҳким бахшидани эҳсоси ватандӯстӣ, худшиносии миллӣ ва боло бурдани унсурҳои давлатдории навини Тоҷикистон мебошад.
Зикр шуд, ки 22 май рӯзи бахти миллат аст, зеро тағйиру иловаҳо ба Конститутсия барои беҳбудӣ, таъмин кардани ҳаёти осоиштаи мардум ва ба низом даровардани идоракунии сиёсӣ мусоидат мекунад.