Боздид аз ШВКД-1 ноҳияи Рӯдакӣ

Душанбе, 11.04.2016. /АМИТ «Ховар»/. -Дирӯз, 10 апрели соли 2016 роҳбарияти Вазорати корҳои дохилӣ ба ШВКД-1 дар ноҳияи Рӯдакӣ сафар намуда, бо ҷараёни хизматбарии ҳайати шахсӣ дар минтақаи Рӯдакӣ шинос шуданд.
Зимни боздид аз шароити хизмат ва корҳои ободонию созандагӣ ҳамзамон бо ҳайати шахсии мақомоти милитсияи ноҳияи Рӯдакӣ вохӯрӣ доир карда шуд.
Мақсади вохӯрӣ бо ҳайати шахсӣ суҳбати озод, мубодилаи афкор ва шунидани андешаи онҳо буд.
Дар ҷараёни суҳбат аз дастгирӣ ва ҳидоятҳои Сарвари давлат дар тамоми соҳаҳои ҳаёт, аз ҷумла мақомоти корҳои дохилӣ сухан карда, аз дастовардҳо ва корҳои бунёдкориву созандагӣ дар ин самт ибрози назар карда шуд.
Ҳамчунин бобати баланд бардоштани савияи дониш, маҳорату малакаи касбӣ, тарбияи кадрҳои ҷавон дар рӯҳияи садоқату матонат нисбат ба давлату миллат, ҳифз ва устувории ҳувияти миллӣ, таҳкими қонуният, таъмини тартиботи ҷамъиятӣ ва амнияти шаҳрвандон дастуру супоришҳои мушаххас дода шуд.