Боздиди роҳбарияти ВКД аз ШВКД-2 дар ноҳияҳои Фирдавсӣ ва Шоҳмансур

Душанбе, 20.04.2016. /АМТИ «Ховар»/. Имрӯз вазири корҳои дохилӣ дар ШВКД-2 дар ноҳияи Фирдавсӣ бо шароити хизматӣ, моддӣ-маишӣ ва фаъолияти ҳайати шахсӣ шинос гардид. Шуъбаи мазкур ба наздикӣ таъсис ёфта, бинои он мутобиқи меъёрҳои байналмилалӣ сохта шуда, бо тамоми шароити зарурӣ ва таҷҳизоти корӣ таъмин гардидааст.
Роҳбарияти ВКД зимни шиносоӣ аз ин шуъба барои ободу зебо гардонидани атрофи бино, шинонидани дарахтони сояафкан ва сабзазор кардани минтақаҳои хизматӣ ба масъулин дастуру супоришҳои иловагӣ дод.
Ҳамзамон зимни суҳбат бо ҳайати шахсии шуъбаи мазкур барои пешгирии шомилшавии шаҳрвандон ба ҳизбу ҳаракатҳои террористию экстремистӣ, мубориза бар зидди ҷинояту ҷинояткорӣ, таъмини амният ва ҳифзи тартиботи ҷамъиятӣ як қатор дастуру супоришҳои мушаххас дода шуд.
Имрӯз вазири корҳои дохилӣ ҳамчунин аз ШВКД-2 дар ноҳияи Шоҳмансур, ки ба наздикӣ таъсис ёфтааст, боздид ба амал оварда, ба шароити корӣ ва ҷараёни хизмати кормандони милитсияи ин шуъба аз наздик шинос шуд.
Ҳамзамон барои таъмиру таҷдид намудани бинои нави Мизи шиносномадиҳии ШВКД-2 дар ноҳияи Шоҳмансур, дар қабати бинои ҳамин шуъба ба масъулини соҳа дастуру супоришҳои мушаххас дода шуд.