Боздошти шаҳрванди Афғонистон барои интиқоли арзиши таърихию фарҳангӣ

Душанбе, 4.04.2016 /АМИТ «Ховар»/. Гулбиддини Муҳобиддин шаҳрванди Давлати Исломии Афғонистон аз ҷониби гумрукчиёни тоҷик дар дидбонгоҳи гумрукии Панҷи Поён, воқеъ дар ҷануби Тоҷикистон бо далели интиқоли ғайриқонунии молу ашёи хусусияти таърихию фарҳангии миллӣ дошта боздошт гардид.
Ин шаҳрванди Афғонистон мехост 12 матои дастӣ гулдӯзишударо /болопӯши болиштҳо/, ки арзиши таърихию фарҳангӣ доранд, бидуни санадҳои зарурӣ ва иҷозатномаи Вазорати фарҳанги Ҷумҳурии Тоҷикистон ба Афғонистон интиқол диҳад. Аммо ин амали ӯро гумрукчиёни тоҷик ошкор ва пешгирӣ карданд. Дафтари матбуоти Хадамоти гумруки кишвар иттилоъ медиҳад, ки нисбат ба шаҳрванди Афғонистон парвандаи маъмурӣ боз гардидааст.