Дар Бохтар маҳаллаи беҳтарин муайян гардид

Душанбе, 28.04.2016./АМИТ«Ховар»/. Дар ноҳияи Бохтар ба  ҷашни мубораки  25-солагии Истиқлолияти давлатии Ҷумҳурии Тоҷикистон ҳамаҷониба  омодагӣ  мегиранд. Мақсад аз гузаронидани  мусобиқаи «Маҳаллаи беҳтарин»  низ дар рӯҳияи баланди ватандорӣ  ҷашн гирифтани ин санаи муҳими таърихӣ буд. Дар 16 маҳаллаи ноҳия корҳои поксозӣ, шинонидани гулу буттаҳои ороишӣ, дарахтони  сояафкан, тармиму таҷдиди  биноҳои ташкилоту муассиса ва истиқоматӣ ва  ободу зебо гардонидани атрофии маҳаллаҳо  ба анҷом расида, барои аз назари ҳакамон гузаштан омода гардиданд. Овезон гардидан навиштаҷоти ватандӯстонаи  «Ҷашни Ватан аз остонаи хонаи мо сар мешавад», «Ҷашни фирӯзат муборак, Тоҷикистони азиз!» ва амсоли инҳо шукӯҳи идонаи маҳаллаҳоро афзуд.
Пас аз хулосаи ҳакамон дар ҷамоати шаҳраки Исмоили Сомонӣ кӯчаи Ибни Сино маҳаллаи беҳтарин дониста шуд.