Дар Гулистон ба маблағи 384 млн. 617,9 ҳазор сомонӣ маҳсулоти саноатӣ истеҳсол шуд

Душанбе, 11.04.2016 /АМИТ «Ховар/. Дар се моҳи аввали соли равон саноатчиёни шаҳри Гулистони вилояти Суғд ба маблағи 384 млн. 617,9 ҳазор сомонӣ маҳсулот истеҳсол намудаанд.
Тавре аз мақомоти иҷроияи ҳокимияти давлатии шаҳри Гулистон хабар доданд, ҳаҷми истеҳсоли маҳсулоти саноатӣ нисбат ба нишондиҳандаи ҳамин давраи соли 2015 ба миқдори 113 млн. 542,5 ҳазор сомонӣ зиёд буда, суръати афзоиши истеҳсолот ба 141,9 фоиз баробар мебошад. Музди маоши миёнаи кормандони корхонаҳои саноатӣ 2361 сомониро ташкил дода, дар муқоиса бо соли сипаригардида 565 сомонӣ афзудааст.
Дар семоҳаи аввал 29 корхонаи саноатии шаҳр фаъолият ва аз онҳо 14 корхона пешравии истеҳсолиро нисбати ҳамин давраи соли гузашта аз 118,3 фоиз то 259,4 фоиз таъмин намуданд.
ҶМ ТКММ «Апрелевка», ҶДММ «Ширкати кӯҳӣ — саноатии Тоҷикистону Хитой», «Зарфишон», «Фаровон», «Хубон», «Чархи гандумин» ва ҶСК «Комбинати фулузоти нодири Ленинобод» суръати афзоиши истеҳсоли маҳсулотро бо нишондиҳандаҳои назаррас ҷамъбаст намуданд.