Дар Миср аз саҳми Варорӯд дар тамаддуни исломӣ сухан гуфтанд

Душанбе, 6.04.2016. /АМИТ «Ховар»/. Дар Искандарияи Миср дувумин Конфронси байналмилалӣ таҳти унвони Саҳми сарзамини Варорӯд дар ғанисозии тамаддуни исломӣ ифтитоҳ гардид. Созмондиҳандагони конфронси мазкур Донишкадаи одоби Водии Ҷадид, Донишгоҳи Асют ва Китобхонаи Искандария буда, дар он донишмандону пажӯҳишгарони мисриву хориҷӣ ва дипломатҳои кишварҳои Осиёи Марказӣ иштирок намуданд.
Дар суханронии Сафири Фавқулода ва Мухтори Ҷумҳурии Тоҷикистон дар Қоҳира Хусрав Нозирӣ, ки аз шодбоши наврӯзӣ оғоз ёфт, таъкид шуд, ки тоҷикон ворисони аслии мероси фарҳангии Мовароуннаҳр буда, саҳми ниёкони мо дар ғанисозии он тамаддун беназир аст.
Бо ишора ба ҷойгоҳи муҳимми фарҳангӣ ва илмии Миср дар ҷаҳони араб ва минтақа, сафири кишвари мо изҳори умедворӣ намуд, ки конфронс ба барқарорсозӣ ва густариши ҳамкории самарбахш байни муассисаҳои илмии ду кишвар ҷиҳати пажӯҳиши якҷояи осори муштараки фарҳангӣ мусоидат хоҳад кард.