Дар Спитамен мактаби нав бунёд гардид

Душанбе, 27.04.2016./АМИТ«Ховар»/. Дар шаҳраки Ҷомии ҷамоати Сарбанди ноҳияи Спитамен бо маблағгузории мақомоти иҷроияи ҳокимияти давлатии вилояти Суғд мактаби нав бо маблағи  2 миллиону 800 ҳазор сомонӣ бунёд гардид. Мактаби №32  аз як ошёнаву   ҳашт синфхона иборат буда,  барои 480 хонанда дар ду баст пешбинӣ гардидааст. Мактаби нав дорои шароити зарурии таҳсил, аз қабили синфхонаҳои муҷаҳҳаз, шабакаи ягонаи гармидиҳӣ, ошхона ва майдони варзишӣ буда, дар он хонандагон ба маҳфили рӯзгордорӣ низ фаро гирифта мешаванд.
Абдураҳмон Қодирӣ, раиси вилоят  зимни сафари корӣ ба ноҳияи Спитамен дар маросими ифтитоҳи   ин муассисаи таълимӣ  иштирок  намуда,  зикр кард,  ки дар мактаби нав на танҳо хонандагон аз  шаҳраки Ҷомӣ, балки толибилмони деҳаҳои атроф низ бо истифода аз шароити мусоиди замонавӣ ба таълиму тарбия фаро гирифта мешаванд, — хабар доданд аз  Маркази матбуоти мақомоти иҷроияи ҳокимияти давлатии вилояти  Суғд.
-Дар ин мавзеи наздисарҳадӣ, ки асосан сокинони узбекзабон зиндагӣ мекунанд ва  дар мавриди бо барномаи давлатии таълимӣ пурра фарогир будан мушкил доштанд, бунёди мактаби нав  тақозои замон аст, — тақвият дод манбаъ.