Дар Сурия 50 гурӯҳи мусаллаҳ амалиёти ҷангиро қатъ карданд

Душанбе, 14.04.2016. /АМИТ «Ховар»/. Шумораи гурӯҳҳои мусаллаҳе, ки доир ба қабул ва иҷрои шартҳои оташбас дар Сурия тарафдории худро эълон кардаанд, ба 50 адад расид. Дар ин бора «Интерфакс» бо ишора ба Вазорати мудофиаи Русия хабар медиҳад.
«Шумораи гурӯҳҳои мусаллаҳе, ки оид ба қабул ва иҷрои шартҳои оташбас тарафдории худро эълон кардаанд, ба 50 адад расид», — гуфта мешавад дар иттилоия.
Ҳамзамон шумораи маҳалҳои аҳолинишине, ки ба раванди сулҳ ҳамроҳ шудаанд, бетағйир — 61 адад боқӣ мемонад.
Бино ба маълумоти Вазорати мудофиаи Русия, низоми оташбас дар аксари музофотҳои Сурия мушоҳида мешавад.