Дарвоз нақшаи даъватро дар рӯзи якум иҷро кард

Хоруғ, 01.04.2016. (АМИТ «Ховар»). Дар рўзи нахустини маъракаи муҳим — даъвати баҳории ҷавонписарон ба сафи Қувваҳои Мусаллаҳи Ҷумҳурии Тоҷикистон, ки ҳамасола аз 1-апрел оғоз меёбад, комиссариати ҳарбии ноҳияи Дарвози Вилояти Мухтори Кӯҳистони Бадахшон аз аввалинҳо шуда, нақшаи даъватро сад фоиз иҷро кард. Хотиррасон бояд кард, ки панҷоҳ фоизи зодагони Дарвоз, ки имрӯз худихтиёрӣ озими маркази муоинаи тиббӣ-ҳарбӣ гардида буданд, дорои маълумоти олӣ ҳастанд.
Раиси ноҳияи Дарвоз Абдураҳмонзода Саидбурҳони Саидраҳмон ҳангоми гусели ҷавонон ба сафи хизмат гуфт, ки ин сарзамини бузургу таърихии миллати тоҷикро танҳо фарзанди модари тоҷик метавонад бе дудилагӣ, бо сарбаландӣ, матонату садоқату мардонагӣ муҳофизат намояд, зеро ҳар як ваҷаби ин хоки ватан муқаддас аст ва онро ҳимоя ва дар роҳи осудагии он фидокориву ҷонбозиҳо кардан аз ҳама авлотар аст.