«Дарвозаи тиллоии Тоҷикистон» ба қабули меҳмонон омодагӣ мебинад

Душанбе, 15.04.2016 /АМИТ «Ховар/. Имсол 19—солагии Рӯзи Ваҳдати миллӣ дар Вилояти Мухтори Кӯҳистони Бадахшон баргузор мегардад. Дар робита ба ин дар рӯзҳои ҷашн дар шаҳри Хоруғ ва ноҳияҳои вилоят гузаронидани чорабиниҳои зиёди сиёсӣ, фарҳангию варзишӣ ва илмӣ дар назар дошта шудааст, ки бешубҳа, ба боло бурдани сатҳи худогоҳию худшиносӣ, дар рӯҳияи ватандорию ватанпарастӣ ва илмомӯзӣ тарбия намудани ҷавонон мусоидат менамоянд.
Дар шаҳру навоҳии вилоят баргузории фестивали байналмилалии фарҳангӣ—сайёҳии «Боми Ҷаҳон», мизи мудаввар дар мавзӯи «Нақши воситаҳои ахбори омма дар таҳкими Ваҳдати миллӣ», конфронси ҷумҳуриявӣ дар мавзӯи «Нақши Президенти Ҷумҳурии Тоҷикистон дар таҳкими Ваҳдати миллӣ ва ҳифзи дастовардҳои Истиқлолияти давлатӣ», маҳфили адабии «Диёри ваҳдатофаринам—Тоҷикистон», Рӯзҳои фарҳанги вилояти Суғд дар Вилояти Мухтори Кӯҳистони Бадахшон ва дигар чорабиниҳои сатҳи ҷумҳуриявӣ дар назар аст.
Дар Варзишгоҳи марказии шаҳри Хоруғ бо иштироки меҳмонони воломақоми мамлакат ва хориҷи кишвар намоиши театрикунонидашуда ва барномаи калони консертӣ баргузор мегардад.
Ёдовар мешавем, маротибаи дуюм аст, ки ҷашни Ваҳдати миллӣ дар Вилояти Мухтори Кӯҳистони Бадахшон таҷлил мегардад. Бори аввал 13-солагии Ваҳдати миллӣ соли 2010 дар вилоят дар сатҳи хеле баланд ҷашн гирифта шуд.