Даври омӯзишии «Барномаи мубориза бо маводи нашъаовар» ба итмом расид

Душанбе, 28.04.2016. /АМИТ «Ховар»/. 20 афсари алоқаи Дастаи таъиноти махсуси милитсияи (ДТММ) Вазорати корҳои дохилӣ ва Агентии назорати маводи нашъаовари назди Президенти Ҷумҳурии Тоҷикистон даври омӯзишии думоҳаи «Барномаи мубориза бо маводи нашъаовар»-ро хатм намуданд.
Давраи омӯзишии мазкур зарфияти вазорату идораҳои ширкаткунандаро барои қабулу ирсоли ахбор тавассути дастгоҳи мухобиравие, ки аз ҷониби «Барномаи мубориза бо маводи нашъаовар» ба наздикӣ харид ва тақдим шудааст, баланд бардошт. Афсарони алоқа оид ба тарзи дурусти истифодаи шаклҳои гуногуни мавҷгир барои таъмини сифати баланди ирсоли ахбор, сохтани шабакаҳои муътамади мустақил, барномасозӣ ва муоинаи техникиву насби таҷҳизоти мухобиравӣ дарс хонданд.
Ҳамчунин давраи омӯзишӣ мавзӯъҳои дигари вобаста ба доираи радиобасомад, паҳншавии амвоҷи радиоӣ, тарҳрезии алоқаву ирсоли гузориш, инчунин дарсҳои амалӣ оид ба сохтани мавҷгир  барои кор дар муҳит ва баландии гуногунро низ дар бар гирифт.
Силсилаи давраҳои омӯзишии мазкур имконоти Дастаи таъйиноти махсуси милитсияи (ДТММ) Вазорати корҳои дохилӣ ва Агентии назорати маводи нашъаовари назди Президенти Ҷумҳурии Тоҷикистонро оид ба таъмини иртибот бо сохторҳояшон дар манотиқи дурдаст васеъ намуда, бо ин роҳ ба бунёди ҷабҳаи қавитару муттаҳидтар барои мубориза бо гардиши ғайриқонунии маводи нашъаовар дар Тоҷикистон мусоидат менамояд.