Фарҳангиёни Суғд ба Бадахшон рафтанд

Душанбе, 29.04.2016./АМИТ«Ховар»/. Ба муносибати Рӯзи Ваҳдати миллӣ Рӯзҳои фарҳанги вилояти Суғд дар Вилояти Мухтори Кӯҳистони Бадахшон баргузор мегарданд. Бо ин мақсад  гурӯҳи калони аҳли фарҳангу адаби вилояти Суғд  ба ВМКБ сафар карданд.  Ҳунармандон, гурӯҳи шоирон, занҳои ҳунарманди Суғдзамин  ба мардуми Бадахшон навтарин маҳсули эҷодиётро дастовез бурда,  Театри давлатии шаҳри  Бӯстон ба номи А.С.Пушкин,  театри «Лӯхтак» бо намоишномаи  «Гулранг ва хушранг» дар назди тамошобинон ҳунарнамоӣ мекунанд.
Ҳамчунин гурӯҳи рақсии ансамбли «Зебо», ансамбли фолклорӣ-этнографии «Фалак», дастаи карнайнавозон, Театр — студияи Хандинкамон бо намоишномаҳои  рангин ва  гурӯҳи шоирон бо сарварии Шоири халқии Тоҷикистон Нурмуҳаммад Ниёзӣ, Гулноз, Темурмалик Рустамов, нависанда Маъруф Бобоҷон ва дигарон бо навиштаҳояшон табъи бадахшониёнро болида  месозанд.