Гардиши умумии молӣ дар вилояти Хатлон

Душанбе, 28.04.2016/АМИТ «Ховар»/. Беш аз 900 адад эъломияҳои  барасмиятдарории гумрукӣ  дар зарфи се моҳи соли равон аз ҷониби кормандони  Раёсати минтақавии гумрукӣ дар вилояти Хатлон ба қайд гирифта шудаанд, ки ин омор нисбат ба ҳамин давраи соли гузашта наздик ба 120 адад зиёд аст.
Хадамоти гумруки кишвар иттилоъ медиҳад, ки дар ин давра  гардиши умумии молӣ дар қаламрави вилояти  Хатлон беш аз 90 ҳазор тонна ва бо арзиши гумрукии зиёда аз 100 миллион доллари  амрикоиро ташкил дод, ки  дар қиёс нисбат ба ҳамин давраи  соли сипаригардида  қариб 19  ҳазор тонна кам  ва зиёда аз 38 миллион доллари амрикоӣ зиёд гардидааст.
Гардиши умумии содироти молӣ дар давраи ҳисоботӣ зиёда аз 42  ҳазор тонна бо арзиши гумрукии беш аз 32 миллион доллари амрикоиро ташкил медиҳад, ки нисбат ба семоҳаи аввали соли гузашта наздик ба 30 ҳазор тонна зиёд аст. Воридоти мол дар ин давра зиёда аз 50 ҳазор тонна ва маблағи беш аз 70  миллион доллари амрикоиро  ташкил медиҳад.