Хушунати оилавӣ ва зӯроварӣ нисбат ба зан

Душанбе, 20.04.2016. /АМИТ «Ховар»/. «Хушунати оилавӣ ва зӯроварӣ нисбат ба зан» таҳти чунин унвон имрӯз дар Вазорати молияи Тоҷикистон чорабинӣ баргузор гардид. Дар он намояндагони Кумитаи кор бо занон ва оилаи назди Ҳукумати ҶТ, Вазорати корҳои хориҷии Тоҷикистон, ташкилотҳои байналмилалӣ, Маркази тадқиқоти стратегии назди Президенти ҶТ, равоншиносон ва намояндагони дигар мақомоти дахлдор ширкат намуданд.
Иштирокдорон роҳҳои пешгирӣ намудани зӯроварӣ дар оила, мустаҳкам намудани муносибатҳои ҳамдигар, муҳайё сохтани фазои солиму обод дар оила, ба тарбияи фарзанд аҳамияти ҷиддӣ додан, дар ниҳоди аъзои оила бедор намудани ҳисси ватандӯстию созандагӣ ва дигар масъалаҳои марбутро баррасӣ намуданд.
Дар доираи чорабинӣ ба иштирокдорон филмҳои тасвирии кӯтоҳметраж оид ба муносибати келину хушдоман ва мардону занон намоиш дода шуданд.
Таъкид гардид, ки қонунҳои Ҷумҳурии Тоҷикистон «Дар бораи пешгирии зӯроварӣ дар оила дар Ҷумҳурии Тоҷикистон», «Масъулияти падару модар дар таълиму тарбияи фарзанд», «Дар бораи кафолатҳои давлатии баробарҳуқуқии мардону занон» барои нигоҳдории солимии оила қабул гардида, аз ҷониби ҳар як шаҳрванди кишвар бояд риоя гарданд.