Имкониятҳои сармоягузории ҶФО ба соҳибкорони Тоҷикистон муаррифӣ гардид

Душанбе, 1.04.2016. (АМИТ «Ховар»). «Яке аз самтҳои афзалиятноки ҳамкорӣ таъсис ва рушди фаъолияти муштарак ба ҳисоб меравад. Дар доираи фаъолияти корхонаҳои муштарак мо метавонем лоиҳаҳои сармоягузории самтҳои гуногунро татбиқ намоем»,-гуфт директори генералии КВД «Тоҷинвест»-и Кумитаи давлатии сармоягузорӣ ва идораи амволи давлатии ҶТ Забирзода Некрӯй зимни мизи мудаввари соҳибкорони Тоҷикистону Олмон, ки имрӯз дар Душанбе баргузор гардид.
Мақсади баргузории чорабинии мазкур таҳкими ҳамкории судманди тиҷоратӣ байни ду кишвар, ҷалби сармояи хориҷӣ ва дарёфти шарикон буд.
Дитер Халер, сардори раёсати иқтисодии Вазорати корҳои хориҷии Ҷумҳурии Федеративии Олмон имкониятҳои сармоягузории ҶФО-ро муаррифӣ кард.
Дар мизи мудаввар зикр гардид, ки ҳамкории Тоҷикистон ва Олмон дар самти сармоягузорӣ сол то сол таҳким меёбад.
Дар давраи солҳои 2007 то 2015 аз ҷониби сармоягузории ҶФО ба иқтисодиёти ҶТ 166,7 млн. доллари амрикоӣ сармояи хориҷӣ ворид гардидааст. Аз ин маблағ 6,7 млн. доллар сармоягузориҳои мустақим ва 160,0 млн. долларро қарзҳои корхонаву ташкилоти ҷалбгардида ташкил медиҳанд.
Аз ҳисоби кумаки давлати Олмон дар 10 соли охир дар ҷумҳурӣ 7 лоиҳаи сармоягузории давлатӣ ба маблағи 65,3 млн. доллари ИМА ва 178 лоиҳаи кумаки беруна ба маблағи 152,3 млн. доллари амрикоӣ татбиқ гардиданд, ки аз тарафи 7 агентии давлати Олмон маблағгузорӣ шудаанд.
Тибқи маълумоти оморӣ гардиши савдо байни Тоҷикистон ва Олмон дар соли 2015 -45,3 млн.доллари ИМА-ро ташкил дода, дар муқоиса бо соли 2014 -118 фоизро ташкил медиҳад.
Дар доираи мизи мудаввар бо мақсади ба роҳ мондани ҳамкории судманди тиҷоратӣ нишастҳои дуҷониба байни соҳибкорони Тоҷикистону Олмон баргузор гардиданд.
Таҳияи Лайло Тоирӣ