Истиқлолияти иқтисодӣ — асоси таъмини зиндагии шоиста

Душанбе, 22.04.2016 /АМИТ «Ховар»/. 22 апрел конфронси илмию назариявии ҳайати профессорону устодон ва донишҷӯёни Донишкадаи молия ва иқтисоди Тоҷикистон аз рӯи натиҷаи корҳои илмию тадқиқотӣ бахшида ба 25- солагии Истиқлолияти давлатии Ҷумҳурии Тоҷикистон оғоз шуд.
Ректори донишкада Ашурбой Солеҳзода зикр кард, ки имрӯзҳо дар қаламрави кишвар ба хотири таҷлили бошукӯҳи 25-солагии Истиқлолияти давлатӣ чорабиниҳои зиёд барпо мешаванд. Дастовардҳои миллати тоҷик дар тӯли солҳои истиқлолият назаррас буда, аз рӯи онҳо корҳои илмию тадқиқотӣ бурда мешаванд. Бояд гуфт, ки истиқлолияти иқтисодӣ истиқлолияти давлатиро мукаммал сохта, бидуни истиқлолияти иқтисодӣ мо наметавонем ба комёбиҳо бирасем. Истиқлолият рукни муҳими давлатдорӣ аст ва он ҳамчун пойдевори устувор барои таъмини зиндагии шоистаи мардум шароит фароҳам меоварад. Вазифаи мо, муҳаққиқон, ин нишон додани дастовардҳои истиқлолияти давлатӣ ба наслҳои ҷавон мебошад, — афзуд ректори донишкада.
Дар ҳамоиш дар мавзӯъҳои «Такмили қонунҳои иқтисодӣ дар 25 соли Истиқлолияти давлатии Тоҷикистон», «Иқтидори транзитии Ҷумҳурии Тоҷикистон ва аҳамияти он дар рушди иқтисодиёт», «Бехатарии озуқаворӣ ҳамчун воситаи таъмини ғизои хушсифат» маърӯзаҳо шунида шуданд.
Конфронс пагоҳ, 23 апрел дар бахшҳои иқтисод, менеҷмент ва молия, фаъолияти бонкӣ, бозори коғазҳои қиматнок ва суғурта, ҳуқуқи иқтисодӣ ва молиявӣ, андоз ва гумрук, математика ва фанҳои табиатшиносӣ, баҳисобгирии муҳосибӣ, таҳлил, аудит ва омор, фанҳои гуманитарӣ, забонҳои тоҷикӣ ва русӣ, технологияҳои иттилоотӣ, информатика ва моделсозӣ, варзиш ва мудофиаи гражданӣ кори худро идома медиҳад.