“Корвони саломатӣ” дар хизмати мардуми Хатлон

Душанбе, 9.04.2016 /АМИТ «Ховар/. Тӯли чанд сол аст, ки дар тамоми шаҳру навоҳии кишвар «Корвони саломатӣ” роҳандозӣ гардидааст, ки мақсади он беҳдошт ва ҳифзи тандурустии сокинони минтақа, аз ҷумла бошандагони мавзеъҳои дурдасти ноҳияҳои кӯҳистон маҳсуб меёбад.

Табибони  «Корвони саломатӣ”, ки аслан аз ҳисоби табибони баландихтисосу соҳибтаҷриба иборатанд, ҳазорон сокинони  дурдасти деҳоти Дашти Ҷуми ноҳияи ба номи Шамсиддин Шоҳин, деҳоти Шугнови ноҳияи Ховалинг  ва деҳоти Сари Хосори ноҳияи Балҷувони вилояти Хатлонро аз муоинаи тиббӣ гузаронида, ба онҳо тавсияву маслиҳатҳо доданд ва нафарони ниёзмандро ба таври ройгон ҷарроҳӣ  намуданд.

Чанде пеш “Корвони саломатӣ” ба ноҳияи Данғара сафар намуда, тай ду рӯз зиёда аз 3 ҳазор сокини маркази ноҳия ва деҳоти онро аз ташхис гузаронданд.

“Корвони саломатӣ” натанҳо ба сокинони минтақаҳои дурдасти ноҳияҳои кӯҳистон, инчунин ба ноҳияҳои Восеъ, Кӯлоб, Мир Сайид Алии Ҳамадонӣ, Фархор, Муъминобод ва Темурмалик сафар намуда, ба садҳо эҳтиёҷмандон кумак намуданд,- иттилоъ дод мовини сардори Раёсати тандурустии мақомоти иҷроияи ҳокимияти давлатии вилояти Хатлон оид ба шаҳру ноҳияҳои минтақаи Кӯлоб Мирзоалӣ Миралиев.