Котиби генералии СААД ба Душанбе ташриф овард

Душанбе, 18.04.2016. /АМИТ «Ховар»/. Котиби генералии Созмони Аҳдномаи амнияти дастаҷамъӣ /СААД/ Николай Бордюжа ба Ҷумҳурии Тоҷикистон ташриф овард.
Бино ба иттилои котиби матбуоти СААД Владимир Зайнетдинов, Котиби генералии СААД дар ифтитоҳи нахустин машқҳои муштараки қувваҳо ва васоити иктишофии қувваҳои мусаллаҳи кишварҳои аъзои СААД «Ҷустуҷӯ-2016», ки 18-22 апрел дар машқгоҳҳои «Мағоб» ва «Лоҳур»-и атрофи Душанбе оғоз мегарданд, иштирок мекунад.
Зимни боздид Николай Бордюжа нақша дорад, ки бо роҳбарияти олии сиёсӣ ва ҳарбии Тоҷикистон мулоқот намуда, вазъият дар минтақаи Осиёи Марказии амнияти дастаҷамъиро бо назардошти таъсири омили Афғонистон баррасӣ намояд.
Ӯ ҳамчунин дар бораи омодагӣ ба ҷаласаи мақомоти оинномавии СААД — Шӯрои вазирони корҳои хориҷӣ, Шӯрои вазирони мудофиа ва Кумитаи котибони Шӯрои амният, ки моҳҳои июн-июл дар шаҳри Ереван ба нақша гирифта шудаанд, иттилоъ хоҳад дод.