Нақшаи даъват ба хизмати ҳарбӣ 45% иҷро шуд

Душанбе, 14.04.2016. /АМИТ «Ховар»/. Дар давоми беш аз 10 рӯзи маъракаи муҳими сиёсӣ иҷрои нақшаи даъват дар қаламрави ҷумҳурӣ 45%-ро ташкил дод.
Бино ба иттилои Вазорати мудофиаи кишвар, то имрӯз гарнизони Хоруғ нақшаи даъвати шаҳрвандонро ба хизмати ҳарбӣ 59% иҷро намуда, ноҳияи Дарвоз дар хусуси пурра ба анҷом расонидани нақшаи пешбинишуда гузориш дод.
Шаҳри Сарбанд аз иҷрои пурраи нақшаи даъват гузориш дода, иҷрои нақша дар қаламрави вилояти Хатлон 49%-ро ташкил медиҳад. Ҳамин тариқ, дар комиссариатҳои ҳарбии ноҳияҳои тобеи ҷумҳурӣ иҷрои нақша 37% ва дар чаҳор навоҳии пойтахт 25%-ро ташкил медиҳад.
Тавре ки қаблан иттилоъ дода будем, дар асоси фармони Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон «Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1989-1998 Ҷумҳурии Тоҷикистон ба хизмати ҳарбӣ» аз 1-уми апрели соли 2016 дар тамоми шаҳру навоҳии мамлакат даъвати баҳории шаҳрвандон ба хизмати ҳатмии ҳарбӣ оғоз гардид.
Ҳамин тариқ, дар рӯзи нахустини даъват ноҳияҳои Кӯҳистони Мастчоҳ ва Истиқлоли вилояти Суғд нақшаи ба онҳо пешбинишударо пурра ба анҷом расониданд. Чорабинии мазкур дар дигар шаҳру навоҳии ин минтақа муташаккилона идома дошта, иҷрои нақша дар вилояти Суғд ба 46% баробар мебошад.