Нақши китобхона дар баланд бардоштани маънавиёти ҷомеа

Душанбе, 04.04.2016 /АМИТ «Ховар/. «Китобхонаи оммавии вилояти Хатлон ба номи Шамсиддин Шоҳин барои китобхонаҳои шаҳру ноҳияҳои вилоят маркази илмию методӣ ва ёрирасон ба шумор меравад»,- иброз намуд Тӯтинисо Юсупова дар машварати омӯзишие, ки дар Китобхонаи марказии ба номи «Дӯстии халқҳо»-и шаҳри Норак дар мавзӯи «Нақши китобхона ва китобдор дар баланд бардоштани маънавиёти ҷомеа ба воситаи китоб» баргузор гардид.
Машварат бо мақсади ҷалби ҳар чӣ бештари наврасону ҷавонон ба китобу китобхона, тарғибу ташвиқи мероси гаронмояи фарҳанги миллӣ ва дастовардҳои тозаи илмӣ-техникӣ дар байни онҳо, тарбияи ҳисси худшиносиву ватандӯстӣ ва ташаккули ҷаҳонбинии илмии насли наврас гузаронида шуд.
Аз ҷониби шуъбаи маълумотдиҳию библиографӣ ба мудирони китобхонаҳои деҳот дар мавзуҳои «Паём-роҳнамои мост», «25-баҳори Истиқлол», «Пайрави Пешвои миллат бошем», «Мирзо Турсунзода ва Лоиқ Шералӣ шоирони достону ғазалсаро» ва «Устоди аввалини ман» дастурҳои методӣ барои баргузории суҳбату вохӯриҳо дастрас карда шуд.
Китобдорон тасмим гирифтанд, ки чунин машваратҳои омӯзиширо дар китобхонаҳои марказии шаҳру ноҳияҳои вилоят мунтазам баргузор намоянд.