Ниммарафон ба муносибати Рӯзи пойтахт

Душанбе, 16.04.2016 /АМИТ «Ховар/. Имрӯз ниммарафони байналмилалӣ бахшида ба Рӯзи пойтахти Тоҷикистон дар шаҳри Душанбе баргузор  шуд.

Мусобиқа  миёни мардон бо ғолибияти Кибого Вилсон, варзишгари кениягӣ ва миёни занон бо пирӯзии Даря Маслова, варзишгари Қирғизистон ба анҷом расид.  Бояд зикр кард, ки  дар ниммарафон, ки пеш аз зуҳри имрӯз  баргузор шуд, ҷойи дуюм миёни мардон насиби варзишгари узбекистонӣ Андрей Петров ва ҷойи сеюм насиби Иван Бабарика аз Украина гардид.

Ҷойи чорумро Ҳасан Ғафуров, варзишгари Тоҷикистон, ҷойи панҷумро Алтат Иматов аз Қазоқистон ва ҷойи шашумро Владислав Мамедов аз Узбекистон соҳиб шуданд.

Миёни занҳо ҷойи якумро Даря Маслова, аз Қирғизистон, ҷойи дуюмро Гулжанат Жанатбек аз Қазоқистон ва ҷойи сеюмро Олга Котовская аз Украина гирифтанд. Зинаҳои 4,5,6 насиби варзишгарзанони Қирғизистон, Кения ва Узбекистон гардиданд.