Низоми бонкии кишвар дар шароити буҳрони молиявии ҷаҳони муосир

Душанбе, 4.04.2016. /АМИТ «Ховар»/. «Ҳолати низоми бонкии Ҷумҳурии Тоҷикистон дар шароити буҳрони молиявии ҷаҳони муосир», дар ин мавзӯъ бо ташаббуси кафедраи фаъолияти бонкии Донишкадаи молия ва иқтисоди Тоҷикистон конфронси илмӣ-амалӣ доир гардид.

Тавре ки аз донишкадаи мазкур ба АМИТ «Ховар» хабар доданд, дар конфронс  раиси Кумита оид ба иқтисод ва молияи Маҷлиси намояндагони Маҷлиси Олии Ҷумҳурии Тоҷикистон, доктори илмҳои иқтисодӣ Шариф Раҳимзода дар мавзӯи «Сиёсати молиявӣ ва муаммоҳои имрӯзаи идоракунии он», иқтисодчии намояндагии доимии Бонки Осиёии рушд дар Тоҷикистон, номзади илмҳои иқтисодӣ  Муҳаммадӣ Бобоев дар мавзӯи «Вазъи макроиқтисодиёти Ҷумҳурии Тоҷикистон, дурнамо ва рушд», ходими пешбари шуъбаи таҳқиқотҳои назариявӣ ва таърихи иқтисодии Институти иқтисодиёт ва демографияи Академияи илмҳои Ҷумҳурии Тоҷикистон Искандар Давлатов дар мавзӯи «Осебпазирии низоми бонкии Тоҷикистон» суханронӣ намуданд.

Шариф Раҳимзода зимни суханронии худ доир ба дурнамои сиёсати иқтисодии кишвар, сатҳи таваррум, рушди номуназзами иқтисод ва устувории пули миллӣ изҳори андеша намуд.

Конфронс дар бахши молия, андоз ва фаъолияти бонкӣ ва бахши таҳлил ва идора дар иқтисодиёт доир гардид. Иштирокдорон роҷеъ ба масъалаҳои роҳҳои самаранок истифодабарии қарзҳои бонкӣ дар шароити имрӯза, механизмҳои асосии пардохтпазирии ташкилотҳои қарзӣ дар шароити имрӯза ва роҳҳои такмилдиҳии маблағгузории буҷети давлатӣ маърӯзаҳо намуданд.