Олимпиада барои дохил шудан ба донишгоҳҳои Русия оғоз ёфт

Хуҷанд, 6.04.2016 /АМИТ «Ховар»/. Дар доираи 5-умин ярмарка-намоиши байналмилалии Таҳсилоти россиягӣ. Душанбе 2016 дар мактаби таҳсилоти миёнаи умумии рақами 23-и шаҳри Хуҷанд мулоқоти нахустини намояндагони 8 мактаби олии Русия бо хатмкунандагони шаҳри Хуҷанд доир гардид.
Чорабиниро сарвари маркази дарёфт ва рушди истеъдодҳои Раёсати маорифи вилоят Баҳоваддин Хоҷаев ҳусни ифтитоҳ бахшида, зикр намуд, ки равобити Ҷумҳурии Тоҷикистон бо кишвари ба мо дӯсти Федератсияи Русия сол то сол густариш ёфта, саҳми ин давлат дар омодасозии кадрҳои соҳибтахассус торафт зиёд мешавад. Ҳамасола баргузории ярмарка- намоиши байналмилалии Таҳсилоти россиягӣ» шаҳодати ин гуфтаҳост.
Намояндагони донишгоҳҳои Русия тариқи видеонавор, буклету нашрияҳо муассисаҳои таълимии худро муаррифӣ намуданд.
Зимни мулоқот онҳо аз афзалиятҳои муассисаи худ, ба монанди хобгоҳ, пойгоҳи моддиву техникӣ ва шароити таълиму тадрис сухан намуда, зикр карданд, ки сол то сол шумораи донишҷӯёни тоҷик дар ин муассисаҳо зиёд мегардад.
Ёдовар мешавем, ки имрӯз олимпиада барои дохил шудан ба Донишгоҳи давлатии тиббии Олтой, Донишгоҳи давлатии ҳуқуқи Уралск ва Донишгоҳи федералии Шарқи Дур доир мешавад.