Омӯзиши кори иҷтимоӣ бо нашъамандон

Душанбе, 2.04.2016. (АМИТ «Ховар»). Коршиносон аз ташкилоти олмонии “Deutsche AIDS Hilfe” барои гурӯҳи кории миллии иборат аз 15 ташкилоти ҷамъиятии маҳаллӣ аз ҳамаи ноҳияҳои Тоҷикистон, Донишгоҳи миллии Тоҷикистон ва Маркази норкологӣ омӯзиши дурӯзаро оиди кори иҷтимоӣ бо нашъамандони ашадӣ гузарониданд.

Омӯзиши мазкур дар чаҳорчӯбаи марҳилаи шашуми Барномаи пешгирии паҳншавии нашъамандӣ  дар Осиёи Марказӣ (CADAP-6) дастгирӣ шудааст. Ин барнома аз тарафи Иттиҳоди Аврупо маблағгузорӣ шуда, бо Консортсиум аз Недерландия, Ҷумҳурии Чехия, Полша ва Олмон амалӣ мешавад.

Барномаи пешгирии паҳншавии нашъамандӣ  дар Осиёи Марказӣ (CADAP-6) давомати сиёсати ИА ва ҳамкории дарозмӯҳлат бо шарикони Осиёи Марказӣ барои мусоидат ба минбаъд тақвият додани сиёсати миллии онҳо дар паст кардани талабот ба маводи нашъаовар мебошад.

Дар давоми омӯзиш, намояндагони ташкилотҳои иҷтимоӣ тарзу услубҳои амалии омӯзишро муайян карданд ва масоили таалуқ ба кори иҷтимоӣ ва офиятбахшии рӯҳиву иҷтимоии истеъмолкунандагони афюнро бо шиддат муҳокима намуданд. Дар тартибдиҳии дастурамал доир ба хизматрасониҳои дастгирикунанда ба одамоне, ки маводи нашъаоварро тариқи тазриқ қабул мекунанд, коршиносони маҳаллӣ хеле фаъол ҷалб хоҳанд шуд.

Дар солҳои 2016 ва 2017 коршиносони маҳаллӣ дар якқатор семинарҳо иштирок хоҳанд кард ва пас аз хатми ин семинарҳо ба онҳо сертификатҳои Донишгоҳи фанҳои амалии Франкфурт тақдим карда мешаванд. Баҳри минбаъд беҳтар кардани стандартҳои кори иҷтимоӣ бо истеъмолкунандагони афюн дар мувофиқа бо беҳтарин таҷрибаҳои ИА, коршиносони маҳаллӣ дар навбати худ ин омӯзишҳоро ба мутахассисони маҳаллӣ мегузаронанд.