Парлумон ба қонуни боҷи давлатӣ тағйирот ворид менамояд

Душанбе, 4.04.2016./АМИТ Ховар/.  Интизор меравад, ки  палатаи поёнии Парлумони Тоҷикистон ояндаи наздик лоиҳаи Қонуни Ҷумҳурии Тоҷикистон «Дар бораи фаъолияти суғуртавӣ»-ро баррасӣ ва қабул намояд. Масъалаи мазкур 4 апрел дар ҷаласаи  Шӯрои палатаи поёнии Парлумони мамлакат, ки таҳти раёсати Шукурҷон Зуҳуров-раиси Маҷлиси намояндагон доир гардид,  баррасӣ шуд.

Аъзои Шӯрои Маҷлиси намояндагон ҳамзамон лоиҳаи қонунҳои Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи боҷи давлатӣ», «Дар бораи бақайдгирии давлатии шахсони ҳуқуқӣ ва соҳибкорони инфиродӣ»,  «Дар бораи иҷозатномадиҳӣ ба баъзе намудҳои фаъолият», «Дар бораи мубориза бар зидди терроризм», «Дар бораи байторӣ», «Дар бораи ҳифзи муҳити зист»,   «Оид ба ворид намудани тағйирот ба Қонуни Ҷумҳурии Тоҷикистон «Дар бораи адвокатура ва фаъолияти адвокатӣ»,  ворид намудани тағйиру иловаҳо ба Кодекси фазои ҳавоии Ҷумҳурии Тоҷикистон ва ба Кодекси оилаи Ҷумҳурии Тоҷикистонро муҳокима намуда, қарорҳои дахлдор қабул карданд.