«Равонбахш»- тавонбахши маъюбон

Душанбе, 19.04.2016 /АМИТ «Ховар/. Соли дуюм аст, ки дар деҳаи Файзободи ҷамоати деҳоти Дашти Гулои ноҳияи Мир Сайид Алии Ҳамадонӣ Ташкилоти ҷамъиятии маъюбон «Равонбахш» фаъолият мекунад ва дар он то имрӯз 20 нафар мардону занони ҷисман осебдидаи деҳоти мазкурро бо кори доимӣ таъмин намудаанд.
Муассис ва роҳбари ташкилот сокини деҳаи мазкур, маъюби дараҷаи аввал Зайнулло Муродови 36 сола аст. Мавсуф 20 сол қабл дар як садамаи нохуши нақлиётӣ аз сутунмуҳра зарб хӯрда, аз ҳаракати пойҳои хеш абадан маҳрум мешавад.
З. Муродов баробари анҷоми корҳои эҷодӣ, инчунин барои ба роҳ мондани фаъолияти истеҳсолии ташкилот саъю талош меварзад. Бо дастгирии роҳбарияти ҷамоати деҳоти Дашти Гуло ва «Барномаи рушди Милали Муттаҳид дар минтақаи Кӯлоб» 16 адад дастгоҳҳои дарздӯзии замонавӣ дастрас карда, корхонаи дӯзандагӣ бунёд менамояд.
Имрӯз корхона ба истеҳсоли маҳсулоти ниёзи мардум машғул буда, дар он маъюбон, ки аксарашон ҷавондухтаронанд, таҷрибаи хуби истеҳсолӣ андӯхта, маҳсулоти хешро, ки аслан аз рахти хоб ва ҷиҳозҳои арӯсию домодӣ иборат аст, манзури сокинони ноҳияву минтақа менамоянд.
«Корхонаи мо дар як бинои муваққатӣ қарор дорад ва мақсад дорем, ки дар рӯзҳои наздик бо кумаку дастгирии ашхоси саховатманду сокинони худи деҳа сохтмони бинои корхонаро бо усули ҳашар шурӯъ намоем. Кӯшиш дорем, ки фаъолияти истеҳсолиамонро васеъ карда, бо ҳамин восита шахсони маъюбро ба кор ҷалб намоем. Барои амалӣ гаштани ин нияти нек ташкилот ба дастгирии мақомоти дахлдор ниёз дорад,- иброз намуд Зайнулло Муродов.