Роҳбаладони сайёҳии Тоҷикистон бо таҷрибаи ҷаҳонӣ шинос мешаванд

Хоруғ, 16.04.2016 /АМИТ «Ховар»/. Раёсати ҷавонон, варзиш ва сайёҳии ВМКБ барои мутахассисони маҳаллӣ ва роҳбаладон дар соҳаи сайёҳӣ зери унвони «Ёрии аввалиндараҷа дар ҷойҳои хатарнок ва дигар имкониятҳои рушди сайёҳӣ» семинар баргузор кард.
Ба гуфтаи мушовири соҳаи сайёҳӣ Матеяс Пойшел, ки дар семинар ширкат дошт, мақсад аз баргузории омӯзиш омода кардани мутахассисони маҳаллӣ ва роҳбаладони маслакӣ ҳангоми сайру сайёҳат дар доманакӯҳҳо ва дигар мавзеъҳои хатарзо мебошад. Дар ин гуна лаҳзаҳо онҳо бояд донанд, ки бо чӣ тарзу усул худ ва ҳамсафаронашонро аз хатари эҳтимолӣ наҷот диҳанд. Иқлими сайёра бо гузашти сол тағйир меёбад ва дар паи худ офатҳои гуногуни табииро ба вуҷуд меорад. Бахусус дар манотиқи кӯҳистон. Аз ин рӯ мо дар ин давраи омӯзишӣ бо таҷрибаи роҳбаладони ҷаҳон инҳоро ошно мекунем, то дар мавридҳои зарурӣ аз он истифода баранд.
Ба гуфтаи ин мураббӣ, чанд нафар аз иштирокдорони семинар ба наздикӣ дар намоишгоҳи ҷаҳонии сайёҳӣ, ки дар Олмон баргузор гашт, ширкат варзиданд. Онҳо низ аз дидаву шунидаҳояшон суҳбат хоҳанд кард.
Мутахассиси пешбари Раёсати ҷавонон, варзиш ва сайёҳии вилоят Хоҷабегим Назармамадова оид ба имкониятҳои рушди туризм ҳарф зада, гуфт, ки мақомоти иҷроияи ҳокимияти давлатии вилоят барои омода кардани кадрҳо дар соҳаи ҷаҳонгардӣ ва ҷалби таваҷҷуҳи сайёҳон ба мавзеъҳои ҷолибу диданӣ тадбирҳои муассир меандешад.