Сокинони Лахш дар раъйпурсии умумихалқӣ фаъолона иштирок менамоянд

Душанбе, 04.04.2016 /АМИТ «Ховар»/. Рӯзи 22 майи соли ҷорӣ доир гардидани раъйпурсии умумихалқиро сокинони ноҳияи Лахш бо як нерӯи сулҳҷӯёнаю созанда интизоранд. Дар натиҷаи корҳои фаҳмондадиҳии Мақомоти иҷроияи ҳокимияти давлатии ноҳия ва гурӯҳҳои таблиғотии ҷумҳуриявӣ маълум гардид, ки сокинони ноҳия омодаанд, ки дар ин санаи таърихӣ фаъолона иштирок намоянд.
Ворид намудани тағйиру иловаҳо ба Конститутсияи (Сарқонуни) Ҷумҳурии Тоҷикистон тақозои давру замон буда, дар шароити кунунӣ саривақтӣ мебошад. Доир ба ворид намудани тағйиру иловаҳо ба Конститутсия сармутахассиси шуъбаи рушди иҷтимоӣ ва робита бо ҷомеаи дастгоҳи раиси ноҳияи Лахш Сайрам Файзуллоевна иброз намуд, ки: «Ворид намудани тағйиру иловаҳо ба Конститутсияи Ҷумҳурии Тоҷикистон талаби замон буда, барои боз ҳам ривоҷу равнақ ёфтани ҳамаи соҳаҳои хоҷагии халқи кишварамон пешбинӣ гардидаанд.
Конститутсия ҷумҳурӣ сарчашмаи зиндагии шаҳрвандон ва муаянкунандаи сиёсати кишварро дар бар гирифта, барои осон гардидани фаъолияти кормандони ҳамаи соҳаҳо роҳнамо мебошад. Омӯзгори собиқадор Лола Саидҷонова гуфт, ки тағйироту иловаҳо ба Конститутсияи Ҷумҳурии Тоҷикистон барои манфиати аҳолии кишварамон нигаронида шудааст, ки аз ин сиёсати пешгирифтаи Ҳукумати Ҷумҳурӣ Тоҷикистон мо омӯзгорон илҳоми тоза гирифта, барои дар сатҳи зарурӣ тарбия намудани ҷавонон ва баланд бардоштани сифати дониши хонандагон дучанд меҳнат менамоем.