Таъйини ҷазо барои иштирок дар амалиёти ҷангӣ дар қаламрави давлати дигар

Душанбе, 28.04.2016./АМИТ«Ховар»/. Прокуратураи генералии Ҷумҳурии Тоҷикистон парвандаи ҷиноятиро нисбат ба  Исматов Қурбон Аюбович аз рӯи моддаи 32,  қисми 3  ва моддаи 40, эзоҳи 1 (суиқасди ҷалб ва иштироки ғайриқонунии шаҳрвандон дар задухӯрди мусаллаҳона ё амалиёти ҷангӣ дар қаламрави давлатҳои дигар) Кодекси ҷиноятии Ҷумҳурии Тоҷикистон бо тасдиқи фикри айбдоркунӣ барои моҳиятан баррасӣ намудан ба суд  ирсол намуд.
Қ.А.Исматов  барои он айбдор гардид, ки моҳи декабри соли 2015  дар барномаи «Роҳнамо ба сӯи давлати исломӣ»-и радиои интернетии «Зелло»  бо Абу-Шуҳайб ном шаҳрванди Ҷумҳурии Тоҷикистон шинос шуда, ба худ  тахаллуси «Абу-Зубейр»-ро гирифт ва  бо   номбаршуда пайваста суҳбат мекард. Абу-Шуҳайб Қ.А. Исматовро  барои  шомил гардидан ба  гурӯҳи экстремистӣ-террористии ба ном «Давлати исломӣ» даъват намудааст.
Қ.A. Исматов даъвати Абу-Шуҳайбро қабул намуда, бо  ин мақсад 18 феврали соли 2016 тавассути ҳавопаймои хатсайри Маскав-Истанбул ба давлати Туркия парвоз карданӣ  мешавад.  Дар ин ҳангом  аз тарафи кормандони мақомоти ҳифзи ҳуқуқи Федератсияи Русия дастгир гардида,  ба Ҷумҳурии Тоҷикистон баргардонида шудааст.
Бо ҳукми Суди ноҳияи Исмоили Сомонии шаҳри Душанбе аз 15 апрели соли 2016 Қ.А. Исматов дар содир намудани ҷинояти мазкур  гунаҳгор дониста шуда, ба ӯ ҷазои маҳрум сохтан аз озодӣ ба муҳлати 6 сол таъйин гардид.
Дар ин хусус аз Маркази матбуоти Прокуратураи генералии Ҷумҳурии Тоҷикистон иттилоъ доданд.