Таъсиси ҷоизаҳои нави ифтихорӣ барои олимон

Хуҷанд, 5.04.2016. /АМИТ «Ховар/. Кумитаи иҷроияи ҲХДТ дар вилояти Суғд бо мақсади ҳавасмандгардонӣ ва дастгирии олимон таваҷҷўҳи хосса зоҳир намудан ба рӯзгор ва осори аҳли илму адаб ва арҷгузорӣ ба хизмати шахсиятҳои баргузида се ҷоизаи ифтихорӣ таъсис дод.
Тавре ки ба АМИТ Ховар раиси Кумитаи иҷроияи ҲХДТ дар вилояти Суғд Сарфароз Юнусов иттилоъ дод, ин ҷоизаҳо риштаи адабиёт, санъат ва журналистикаро дар бар гирифта, онҳо ба номи се олими варзида Абдулманнони Насриддин (соҳаи адабиёт), Наимҷон Ҳакимов (соҳаи фарҳанг) ва Ҳасанбой Шарифов (соҳаи журналистика) таъсис дода шудаанд.
Ин се олими намоён дар се риштаи илми тоҷик саҳми арзишманд гузошта, барои пешрафти илмҳои адабиёт, фарҳанг ва таъриху журналистика хизматҳои шоёнро ба ҷо овардаанд. Аз ин лиҳоз кумитаи тадорукот тасмим гирифт ҷоизаҳои таъсиснамударо ба исми ин шахсон номгузорӣ намояд. Озмун дар ду сол як маротиба аз ҷониби Кумитаи иҷроияи ҲХДТ дар вилояти Суғд эълон ва дар арафаи ҷашни Ваҳдати миллӣ гузаронида мешавад. Ба озмун асарҳои илмӣ дар соҳаи тадқиқотҳои бунёдӣ, дар риштаи инкишофи адабиёт, журналистика ва фарҳанг ҳамчунин корҳои ҷудогонаи илмӣ дар доираи силсилаи корҳои илмӣ дар як мавзӯъ аз 1 апрел то 1 июни соли 2016 қабул карда мешаванд, — афзуд, С. Юнусов.