Тренинг: «Моҳияти маълумоти кушода дар рушди хизматрасониҳои электронӣ»

Душанбе, 4.04.2016 /АМИТ «Ховар»/ . Дар шаҳри Хуҷанди вилояти Суғд тренинги омӯзишӣ оид ба «Моҳияти маълумоти кушода дар рушди хизматрасониҳои электронӣ» аз ҷониби Фонди ҷамъиятии «Ташаббуси шаҳрвандии сиёсати интернет» оғоз гардид.
Тренинг тӯли 5-рӯз идома ёфта, дар он зиёда аз 60 намояндаи вазорату идораҳо, корхонаю муассисаҳои давлатӣ, рӯзноманигорони сомонаҳои интернетӣ ва ташкилоти байналмилалию ҷамъиятӣ иштирок менамоянд.
Ҳадафи баргузории чорабинӣ ин таҳкими тавонмандии кормандони давлатӣ ва намояндагони ҷомеаи шаҳрвандӣ барои истифодаи самараноки маълумоти кушода дар рушди хизматрасониҳои электронӣ мебошад. Дар раванди тренинг иштирокчиён таҷрибаи ватании хизматрасониҳои электрониро баррасӣ намуда, омилҳои бобарори рушди ҳукумати электрониро арзёбӣ менамоянд.
Бояд гуфт, ки доир намудани чунин тренинги омӯзишӣ барои баланд бардоштани малакаю маҳорати кормандони соҳаи хизматрасониҳои электронӣ, таҳкими мавқеи минтақавию ҷаҳонии Тоҷикистон ва расидан ба ҳадафҳои рушди устувор ва стратегии кишвар мусоидат хоҳад кард.