Қурғонтеппа: омодагиҳо ба таҷлили Рўзи Истиқлолияти давлатии Ҷумҳурии Тоҷикистон вусъат мегиранд

Душанбе, 22.04.2016/АМИТ«Ховар»/. Дар шаҳри Қурғонтеппа барои дар сатҳи баланд ҷашн гирифтани Рўзи Истиқлолияти давлатии Ҷумҳурии Тоҷикистон корҳои омодагӣ вусъат меёбанд. Аз ҷумла, аз ҷониби кормандони муассисаи давлатии коммуналӣ ва чароғонкунию ороишӣ дар кӯчаву хиёбонҳо ва майдонҳои ҳудуди шаҳр дар ҳаҷми 2880 метри мураббаъ шиору навиштаҷот овезон гардиданд.
Тибқи иттилои Қаҳрамон Бобохонов, роҳбари Маркази матбуоти дастгоҳи мақомоти иҷроияи ҳокимияти давлатии шаҳр дар кӯчаву хиёбонҳо 750 адад лампаҳои гуногунҳаҷм насб гардида, 445 метр симҳои гуногунҳаҷми барқӣ иваз ва парчамҳои овехташуда нав шуданд.
-Бо ин мақсад зиёда аз 17 километр роҳҳои асосӣ ва дорои аҳамияти маҳаллӣ бо иваз намудани хати фазлаоб, новаҳои паҳлуи роҳ аз таъмири асосӣ бароварда шуда, ду кӯпруки асосии маркази шаҳр -яке пурра навсозӣ ва дигаре таъмири ҷорӣ гардиданд ва тамоми роҳравҳои пиёдагарди шаҳр сафолакпӯш шуданд, — афзуд Қ.Бобохонов.