«Зӯроварии хонаводагӣ ва солимии репродуктивӣ» -машварат дар Варзоб

Душанбе, 19.04.2016 /АМИТ «Ховар»/. Кумитаи кор бо занон ва оилаи назди Ҳукумати Ҷумҳурии Тоҷикистон дар ҳамкорӣ бо ташкилоти ҷамъиятии «Лигаи занони ҳуқуқшинос» дар ноҳияи Варзоб дар мавзуи «Зӯроварии хонаводагӣ ва солимии репродуктивӣ» бо ҷалби намояндагони бахши кор бо занон ва оила, танзими анъана ва ҷашну маросимҳои миллӣ, шуъбаҳои Сабти асноди ҳолати шаҳрвандӣ, маориф, раисони ҷамоатҳо, шӯроҳои занон ва имомхатибони масҷидҳо машварат баргузор намуд.
Машварат аз рӯи «Барномаи давлатии пешгирии зӯроварӣ дар оила дар Ҷумҳурии Тоҷикистон барои солҳои 2014-2023» роҳандозӣ гардида, зимни он қонунҳои Ҷумҳурии Тоҷикистон «Дар бораи пешгирии зӯроварӣ дар оила дар Ҷумҳурии Тоҷикистон», «Масъулияти падару модар дар таълиму тарбияи фарзанд», «Дар бораи кафолатҳои давлатии баробарҳуқуқии мардону занон», Кодекси оила, санадҳои ҳуқуқии байналмилалӣ, ки аз ҷониби Тоҷикистон эътироф шудаанд, аз қабили «Конвенсия оид ба ҳифзи ҳуқуқи инсон», ҳифзи ҳуқуқи кӯдак мавриди баррасӣ қарор гирифтанд.
Иштирокдорони машварат саҳначаҳоро аз ҳаёти воқеӣ дар мавзӯи «Муносибати келину хушдоман», «Уҳдадориҳои мард дар барқарор намудани саломатии зан ҳангоми ҳомиладорӣ» ва филмҳои мустанадро оид ба зӯроварии хонаводагӣ тамошо намуда, дар масъалаҳои пешгирӣ намудани он, фазои солиму обод муҳайё сохтан дар оила, ба тарбияи фарзанд аҳамияти ҷиддӣ додан, дар ниҳоди аъзои оила бедор намудани ҳисси ватандӯстию созандагӣ мубодилаи афкор намуданд.