Ҳамоиш оид ба ҷорӣ намудани ҷанбаҳои гендерӣ дар барномаи ислоҳоти милитсия

Душанбе, 5.05.2016 /АМИТ «Ховар»/. 4 майи соли равон бо ташаббуси роҳбарияти Вазорати корҳои дохилӣ ва дастгирии Бюрои Созмони амният ва ҳамкории Аврупо дар Тоҷикистон дар доираи барномаи «Бунёди механизмҳои таъсирбахши ҳамкорӣ дар сатҳи маҳал миёни мақомоти милитсия ва ҷомеаи шаҳрвандӣ дар самти кумак ба ҳимояи зарардидагон аз зӯроварӣ дар оила» дар ноҳияи Ҷайҳуни вилояти Хатлон аъзои зергурӯҳи корӣ оид ба ҷорӣ намудани ҷанбаҳои гендерӣ дар барномаи ислоҳоти мақомоти милитсия ҷаласа баргузор гардид.
Дар ҷаласа мушовир оид ба масъалаҳои баробарии гендерӣ ва муқовимат бар зидди савдои одамони САҲА Виорелия Русу дар мавзӯи мубодилаи таҷриба дар самти созмон додани механизмҳои ҳамкорӣ ва фаъолияти бисёрҷонибаи гурӯҳҳои корӣ дар расонидани кумак ва ҳимояи ҷабрдидагони зӯроварӣ дар оила ва таҷрибаи Ҷумҳурии Молдова дар ин самт ибрози андеша намуд.
Муовини сардори шуъбаи РҲТҶ ВКД Нуралӣ Қурбонов вобаста ба ҳолати кор нисбат ба фаъолияти мақомоти корҳои дохилӣ дар мавриди амалисозии ҚонуниҶумҳурии Тоҷикистон «Дар бораи пешгирии зӯроварӣ дар оила», натиҷаҳои кор дар соли 2015 ва чор моҳи соли 2016 сухан гуфт.
Ҳадафи ҳамоиш аз истифодаи таҷрибаи якдигар дар самти ҳамкории байниидоравӣ дар самти расонидани ҳимоя ба ҷабрдидагони зӯроварӣ дар оила, тақвият додани мубодилаи таҷриба миёни нозирони махсуси милитсия, ки оид ба пешгирии зӯроварӣ дар оила фаъолият доранд, иборат буд.
Дар ин бора ба АМИТ «Ховар» аз Вазорати корҳои дохилии ҶТ хабар доданд.