Ҳамоиши идона бахшида ба ҶДҶ

Душанбе, 10.05.2016 /АМИТ «Ховар»/. Бахшида ба 71-умин солгарди Ғалаба дар Ҷанги дуюми ҷаҳон дар Вазорати маориф ва илми Ҷумҳурии Тоҷикистон ҳамоиши идона баргузор шуд.
Дар ҳамоиш зикр гардид, ки дар муҳорибаҳои Ҷанги дуюми ҷаҳон беш аз 260 ҳазор нафар фиристодагони Тоҷикистон иштирок намудаанд. Онҳо барои дифои Ватан ва шарафу номуси мардуми худ дар сангарҳо муборизаи шуҷоатнок ва корнамоиҳои бузург нишон дода, зиёда аз 92 ҳазор нафарашон дар майдонҳои набард ҳалок шудаанд. Ба нишони қадрдонии далерию қаҳрамонӣ 54 нафар ҳамватанони мо бо унвони олии ифтихории Ватан — Қаҳрамони Иттифоқи Шӯравӣ, 21 нафар бо ҳар се дараҷаи ордени «Шараф» ва зиёда аз 60 ҳазор нафар бо ордену медалҳо сарфароз шуданд.
-Солҳои Ҷанги дуюми ҷаҳонӣ шумораи умумии фиристодагони Тоҷикистон қариб 300 ҳазор нафарро ташкил медод. Аз ин ҳисоб 49 ҳазору 973 нафари онҳо ба баталёнҳои коргарӣ сафарбар шуданд. Дар муҳорибаҳои шадид тоҷикистониён ҷасорату шуҷоати беҳамто нишон доданд. Дар байни онҳо қаҳрамонони Иттифоқи Шӯравӣ Неъмат Қарабоев, Ҳодӣ Кенҷаев, Туйчӣ Эрҷигитов, Сафар Амиршоев, Исмоил Ҳамзаалиев, Эргаш Шарипов ва чандин ҷанговарони тоҷикистониро номбар кардан мумкин аст, ки барои дифои Ватан дар муҳорибаҳои Ҷанги дуюми ҷаҳон қаҳрамонӣ нишон додаанд,-зикр гардид дар ҳамоиш.